مراهیش نوك ماتبل الورق يا هن

مساعد الرشيدي رحمة الله عليه

 

مراهیش نوك ماتبل الورق يا هن... 

لها اليوم تاسع يوم تبرق ولا سالت... 

يقولون لاضاقت عليك الوسيعةغن... 

وأنا أقول شفت مقرد الخلق وش قالت... 

أنا البارحة من غابت إلين أذن... 

تحلوى عيوني للكرى میر ما إحتالت... 

يثوع النعاس من أرمد الجفن يوم تعن... 

سراميد غيظ بالحشاحبلها فالت... 

ماغير أتدرق بأسمر الليل لا من جن... 

هجوس تخطرت هيبة الجرح وإختالت... 

هجوس ليا قامت تكرب وقمت أون... 

تصرم معاليق الحنايا ليا إنهالت...

 ذلول الهجاد اللي نبت في جماها سن...

 من العام تثعي في ضلوعي ولا زالت... 

حلال الذهاب إلى استشاطت لبسها جن... 

عساي أتجود في نحـرها ليا مالت... 

وأنا يوم أمس بطانها ماعليه من... 

يدين الهوان إن حطت اللوم وإن شالت... 

ابا أزم نفسي عن طمان هواه مصن...

 وأعدي لجفني وأرقب العين وش خالت... 

عليها الملام ولا عليها السلام أبدن... 

يدين تبي قصرة يديني ولا طالت... 

بعد مانفضت بار صدري ولد ياهن... 

بعد ماروت روحي من الغيض وإكتالت... 

يقولون لاضاقت عليك الوسيعة غن...

 وأنا أقول شفت مقرد الخلق وش قالت...

ياعظيمه ضيدان

ياعظيمه كل شي له حدود وله نهايه

لكن انتي ماوقفتي عند حدك ياعظيمه

استلذيتي بطعناتي واخذتيها هوايه

كن مالك حربة توجع وطعنات اليمه

آه ليتك ماتماديتي بطعنات البدايه

لين صار لكل طعنه بالحشى معنى وقيمه

الله يجيبك لكن كيف وفي اغرب روايه

تكتبين الحب كذبه والهوى دقه قديمه

وانتي الذي كل مالدت عيوني في المرايه

مالمحت الا اليتيم اللي خذت قلبه يتيمه

واليتيمه في اليتامى مالها حق الوصايه

الوصيه عودها الغض ونواياها السليمه

لكن انتي صارلك حق الوصايه والولايه

واستبديتي وشد البدو واضحيتي مقيمه

مارحلتي لين حطمتي بما فيه الكفايه

عاقل حب الجنون وصوت نارك في هشيمه

استبحتي حرمه المجنون بدراك وعنايه

والتفتي له بعقلك وارتكزتي في صميمه

امتلكتي غايته لو ماكان له فيك غايه

وانتصرتي في عيونه واعترف لك بالهزيمه

من كثر مايعشقك ماقالك بالحب رايه

خايف الايام لاتطلع عواقبها وخيمه

وفي طريقك كل ماكنه لمس درب الهدايه

تاه ودروب الحياه المستقيمه مستقيمه

تايه بصري ومن جابه لبيت الله تايه

عذر من غمض بعين وعينه الاخرى كريمه

فدوتك مافات من الايام واللي عاد جايه

يابعد عمر مخاسيره معك عندي غنيمه

انتي الفارع بقد وجد واسماء وكنايه

من عشق مثلك يجوز من الهوى وشداد ريمه

ليه لا وانتي بحسنك لذاوات الحسن ايه

لاذهب لاماس لاياقوت لااحجار كريمه

شاعر له مع هل الرايات في المرقاب رايه

كل ماهبت هبوبك فلها قدر وحشيمه

سامحك من الف باء الذنب الى مالانهايه

واستباحك عن خطاه وكل طقه بتعليمه

ويوم قلتي اعطني حريتي اطلق يدايه

ماذخر عن وجهك الا طعنتين في صميمه

عطوني علاجي لو انه عنزروت

 

عطوني علاجي لو انه عنزروت 

ماهو بمر المر جربّت طعمه 

ثنتين ورني مماتي قبل اموت 

يوم الفراق وحاجة ٍعند رخمه 

نجم الاسلمي 

يا وجودي وجد مجروح الفؤادي عبد الله بن زويبن

يا وجودي وجد مجروح الفوادي

من هنوف ثوبها يجرح نهدها

 شافها بالملعبة يوم العيادي

طشت الشيلة و ماحت في جعدها

 كنها بالملعبة صفرا ترادي

بالحبال اللي ملواتٍ عقدها

 سمعت أصوات العزاوي والهنادي

من عياطير السطر يطفر زبدها

 تحتري شيخٍ يقود ولا يقادي

منكفٍ بطماعةٍ لحقوا طردها

 لحقوا الفرسان بظهور الجيادي

وكل راعي مهرةٍ ركب ولكدها

 لابةٍ تقلط على جمع المعادي

مير ربي عاقها وأطفى سعدها

 خيلهم يم الخلا عقب الطرادي

ما تبقي ما يبقى من جهدها

 روحت مثل النعام امع الحمادي

يوم سمعت صوت خيالٍ رهدها

 بنت شيخٍ ما ينافس بالشدادي

كلمته كل القبيلة تعتمدها

 ما تلد بعينها في شخص عادي

ولا يسود الغابة إلا حكم أسدها

 أتفق معها على غير الفسادي

ايتزوجها وياخذها بيدها

 فوق خبرا جمعت كل البوادي

كل من علم بها شد ووردها

 سيلتها يوم هل قران حادي

مزنةٍ كبر القطاة أصغر بردها

 وكل مدة قيضهم والوضع هادي

وأن حصل له فرصة جدد عهدها

 لين قام الحر ينقص والبرادي

يتزايد والمزون أوحم رعدها

 ناحرت لديارها قطم التوادي

أورحت ريح الحيا يمت بلدها

 وأرسلوا عساس للعلم الوكادي

ثم جاهم في علومٍ ما بعدها

 ما بعدها غير صوت اللي ينادي

وكل راعي خيمةٍ شلع وتدها

 وقربوا حمر الونيتات الجدادي

والبيوت السود طاروا في عمدها

 أستخفوا تقل قافيهم هجادي

كل ما جو مصغرٍ شالوا ولدها

 مالهم يم الغنم شف ومرادي

ما شقوا بنعيمها ولا نجدها

 روحت قطعانهم مثل الجرادي

تتعب الحساب ما يحصي عددها

 والهوى معروف شيٍ لا إيرادي

والنتيجة موسفة ما أحدٍ حمدها

 يتسرب مع حلاه من المبادي

سم حية والفراق أمر وأدهى

 لو صبر راع الهوى صبر المهادي

الجروح تبين لو أنه جحدها

 أنطلق مع دربهم حاديه حادي

وكل ما جاء نزلةٍ مر ونشدها

 لين باد ولا لقى علمٍ وكادي

باهت الأخبار عنهم ما وجدها

 كنت غادي وأحسب المدّل غادي

والنتيجة تنكشف لو طال أمدها

 كنت أغني مع مغني يابلادي

وأحسب أن اسمي مسجل في سندها

 لين عرضت للمساوم والمزادي

عكس ما جاء في كتاب اللي مهدها

 

شعر: عبدالله بن زويبن

يا ذا الحمام اللي على ملج وانطاع

 

ياذا الحمام اللى على ملج ونطاع
،،،،،،،،،،،،،،، بالله عليك انحر امام المصلى

تلقى محمد باسفل السيح زراع
،،،،،،،،،،،،،،، قرم الى جوه النشاما يهلى

حيل تقدم و المعاميل شراع
،،،،،،،،،،،،،،، وسوالف عن كل هم اتسلي

ومناسـف يرما بها زين الأنواع
،،،،،،،،،،،،،،، يلحق بهاراعي الهزيل المتلى

لاد دبر الوزنه ولا كال بالصاع
،،،،،،،،،،،،،،، متمعنى به واحد ما يخلى

الصيت لولا فاعل الجود ما شاع
،،،،،،،،،،،،،،، ولا ساد فى قوم بخيل مذلى

وكان رد محمد الفهيد 

على قصيدة مهلهل 

ياراكب من عندنا فوق مـطواع
،،،،،،،،،،،،،،، يشبه لدلو مع شفا البير زلى

ماقلبوا خفه بسير و مرقــاع
،،،،،،،،،،،،،،، يشدا لدانوق بموج مولى

تلفى مهلهل ساكن ملج و نطاع
،،،،،،،،،،،،،،، زبن الحصان الدوبلى كان خلى

تلقاه باولهم الى صار فـزاع
،،،،،،،،،،،،،،، وان دبروا دايم خلاف المتلى

شيخ الشيوخ اللي يفكون الاقطاع
،،،،،،،،،،،،،،، وزبن الدخيل الى لفاهم امذلى

كم فارس بارماحهم يـارد القاع
،،،،،،،،،،،،،، وكم عودة منهم صوابه يشلى

ياستر من حط الخواتم بالأصباع
،،،،،،،،،،،،،،، بالذكر والا شوفهن ماحصلى

سلم عليهم عد ماهب ذعـذاع
،،،،،،،،،،،،،،، وعداد ماخيل سحاب سحاب وهلي

أفرح الا قيل اقبلوا والسلف زاع
،،،،،،،،،،،،،،، هذا مناي وخاطرى يسفهلى

وان كان قيل اقفوا ترى القلب ينلاع
،،،،،،،،،،،،،،، أخوان بتلا قربهم ما يملى

ذى حالة الدنيا مصيف ومرباع
،،،،،،،،،،،،،،، والعمر ينقص كل يـوم يـزلى

الرابح اللى مخلص للولى طاع
،،،،،،،،،،،،،،، اعمل ترا تلقى من دقاق وجلى

يالله تعين الروح لاجاه نزاع
،،،،،،،،،،،،،،، وأرجيك تسمح عن ذنوب مضن لى

لا والله الا راح دور البداوة الحداري

 

يقول الشاعر محمد شبيب الحداري الحربي، -رحمه الله- 

 

لا والله الا راح دور البداوة 

 ودور الركاب اللي عليها الشنوفي 

ومجالس  فيها لأهلها طراوة 

عنها الشوايب والهزيل محذوفي 

وراح الزمان اللي لعيشه حلاوة 

 واللي على الغارب رجع للردوفي 

قالوا تسيّر قلت مامن فضاوة 

 قالوا علامك قلت عيّت ظروفي 

 اللي مضى بالنفس عنف وقساوة 

واليوم تخلي كل عوجاً تطوفي 

وتضحك مع اللي لك يكن العداوة 

 وان صفقوا صفقت له بالكفوفي 

تخاف من دقة خطاة اللعاوة 

 رادي نصيب وناقر له علوفي 

يزعل عليك اللي يسوق الأتاوة 

 وذلّوا معطرت النمش والسيوفي 

عين الغضب تفتح عليك السماوة 

 وعين الرضا لوبك خطا ما تشوفي 

والمرتفع قالوا مثل ذاك ساوه 

 وشربت غثاريب الغريف العيوفي 

هداج مات وجات غيره جباوة 

 والروس قامت تدّرق بالكتوفي 

يزعل ويرضا ما حصل له رضاوة 

 ومثله يصير بحيث تامن تخوفي 

يالله ياللي بيدك الرزق وادراجه ابن جدلان

 

يالله ياللي بيدك الرزق وادراجه

يالله ياللي بيدك الرزق وادراجه افتح لنا أبواب رزقك لا تخيبنا فاحت علينانسيم المسك زعّاجه والمسك جتنا ذعاذيعه وطيّبنا برق الحيا يجذب المسني تليعاجه وإلي جذب غيرنا للبرق جاذبنا جينا يا سلطان ابوخالد لناحاجه ولولا الرجا فيك مازاعت ركايبنا جينا إل ليثٍ يلوح الطيب بحجاجه نشكي على الله ونشكيله متاعبنا نلح بقعا بليا كور وحداجه حتى طويل المدى فضّا مزاهبنا نستربيوت الندا عن كل هرّاجه كنوزنا الصبر والشيمه رواتبنا حتى لحقنا ضعافة وقت حواجه ضعا فتٍ عند مثلك ما تعذربنا وجينالبيتٍ رفيع الساس وادراجه ما هو مباني زجاجٍ توها تبنا كلٍ يروح ويجي ويعد ما واجه واليوم حنّا عيالك وانت شايبنا وإسلم عدد مايهيج البحربامواجه وإقبل تحية ضيوفك يامعزبنا

سعد بن جدلان رحمه الله

قصيدة صقر النصافي ياعلي خل العيد

 

صقر النصافي 

ياعلي لاجيت العرب لا تجي ديش

ياعلي خل العيـد لأم الدناديـش

اللي تنظف كـل يـوم جسدهـا

تبغي تماري ناقضات العكاريش

في كل ملفـاح تنقـض جعدهـا

العيد عيدالله ولو فـات حتيـش

من حسبة ايـام يمـرك عددهـا

نبي نعلمك المساري على الجيش

تمشي ذلولك لين يفتـر جهدهـا

خابرك مانتب ضاري للمطاريش

نبيك تونس حلوها مـن نكدهـا

ليله على مسرى وليله مغابيـش

وليله نخلي نومها لمـن رقدهـا

وليله على تمره وليله على عيش

وليله نوكلك اللحم صيـد يدهـا

ياعلي لاجيت العرب لاتجي تيش

خبل ليا جاب السوالف سردهـا

إحفظ لسانك لا يجي فيه تبطيش

تصبح عيونك كايـدات رمدهـا

يجيك من ينشدك نشدة تكديـش

يبـي يسنـع هرجـة يعتمدهـا

خله يقوم مفلت في يـده ريـش

يروح منك وحاجته ما وجدهـا

ترى دعابيل الخبـول الفوانيـش

تبدي بما فيها ولا احـد نشدهـا

يجيك واحدهم يـورش توريـش

سحابته يسبق مطرهـا بردهـا

واللي لغمقات السوالف مناقيـش

قراية الكلمة علـى اول عددهـا

تجي سوالفهم ضحـك وتبهيـش

وقلوبهم ما احد يفكـك اعقدهـا

اليوم يا عيني علامك ترفين ولا نتي على العادة بنثر الدموعي صقر النصافي

 

قصيدة   صقر النصافي

اليوم يا عيني علامك ترفين

ولا نتي على العادة بنثر الدموعي

أما يبي يلفيك علمن ما هوزين

وإلا اتذكر ما غدى من اربوعي

يا كثر ما نذكر من الناس غالين

حدر الثرى ما عد قيهم رجوعي

راحو مراحن منه ما هم ملفين

صارت منازلهم عذابن للشوعي

الله على وقتن مضي مثل هالحين

ابعد علي اليوم من حب كوعي

إليا ذكرته والمخاليق غافين

جريت ما يفتح مفالج اضلوعي

يوم أن وقتي مقبلن يا أدعج العين

عروس عشق ومعجبتها الدفوعي

واليوم وقتي صار بين اليهاهين

اليا طاب لي يومن خبث لي اسبوعي

دنيا نبي منها عدال الموازين

وتميل لوني في خطاها جزوعي

تضحك لناس بالفرح مستمرين

وناسن تجيهم بالكدر والفجوعي

وصارت بها سود المقانع شياهين

وفحولها صار اتبوع التبوعي

الحب تأثيره على القلب سلطان ....عبدالله بن عون

 

من روائع الشاعر عبدالله بن عون

قصيدة غزلية لعبدالله بن عون

يابوخلف مات الهوى عقب ما كان

حيا ً يغذنه ليال المرابيع

 

إلى مال عربان ٍ على أطراف عربان

وباطرافهم جاء للطوارف تناشيع

 

وليا حصل عقب المرابيع مقطان

وتقاطروا فوق الركايا المفاريع

 

ليا قطبت عد ٍ من الريف طربان

سمر البيوت اللي تسد الترابيع

 

الجانب الشرقي خوالد و مطران

والجانب الغربي على حرب وسبيع

 

ويرده من المظما دواسر و عتبان

و من كل بد ٍ للوسايم تناويع

 

بدايد ٍ معها شقا كل ولهان

خمص المثاني لابسات الدراريع

 

بنات بدو ٍ حوزهن حوز غزلان

نهب القلوب مخيبات الطماميع

 

ومن كان في قلبه للأشواق ميدان

يلقا مجال ٍ يشتري فيه ويبيع

 

ليا عرضت شقر ٍ كما مطرق البان

تلفح جدايلها هبوب الذعاذيع

 

مادونها حاجز حوامي و جدران

هيبات أهلها عن حماها موانيع

 

والحب تأثيره على القلب سلطان

جاير ولا راعيه للعذل بمطيع

 

وأول مداخيله على قلب الأنسان

تجاذب النظرات بين المواليع

 

سراير ٍ يعرف لغاها بالأعيان

تفتح مشاريع ٍ و تلغي مشاريع

 

بين الثنين اللي لهم بالهوى شان

ماهم بخالين العقول القراقيع

 

وليا لقا بقلوب الأثنين مسكان

وثقله توزع بين الأثنين توزيع

 

سيطر و كبرت قيمته عند الأثنان

مادام سره ما عبث به و لا ذيع

 

وأول غرابيله إلى من الأضعان

راحت قسوم وكل ناس ٍ عطت ريع

 

وتفاختو من عقب ماهم بجيران

ليا شيف للنجم الجنوبي تلاميع

 

ونياتهم راحت من العد شتان

وكل ٍ على فاله يذب المخاويع

 

ومن كان مشطون ٍ مع البدو بشطان

أمسى على قلبه حدادالمراقيع

 

وأصبح يعدي في نبا كل مزبان

جسمه معافا و الضمائرمواجيع

 

دور ٍ لحقتوه أنت و يادبيّان

ومن عذبه الصافي خذيتو قراطيع

 

يوم إن لونه ماتغير ولاشان

ولا خربوه مخربين المواضيع

 

عشق ٍ على وضح النقا ماله أثمان

مطامع ٍ عليا وعفه وترفيع