سلامي سـلامٍ يدفعـه صـادق التقديـر
من أبواب حث النفس في فعـل واجبهـا
سلامي على نجد وعلى المجمعه وسديـر
وسلامي علـى ديـرة تميـم ومضاربهـا
وسلامي سلام الود لتميـر وأهـل تميـر
أهل وقفةٍ لا زال يحكـي الزمـان إبهـا
وبعد السلام الله يمسـي الجميـع ابخيـر
علومـي معـا نظـم القوافـي برتبـهـا
دعاني مساعد والحقيقـة مساعـد غيـر
معرفة مساعد عـام الأول ظفـرت إبهـا
انا اريدحامل مسك , ماريـد نافـخ كيـر
ومـن نظرتـي هـذي معرفتـه كاسبهـا
رعى الماقف اللي من زحم به لقى التوقير
ورعى السمعة اللي من عرفها يشيد إبهـا
زبون الضرير اللي عليه الزمـان إمغيـر
ورعى كرمةٍ حتى الصواني تضيق إبهـا
وهذا طرف حايل , وهـذا فقـار بعيـر
وهـذي يقلّطهـا , وهـاذيـك يندبـهـا
بشبهه شط النيل , ما هـوب جمـة بيـر
ينقـص بهـا الميّـاح دلـوه وجاذبـهـا
اله نظرةٍ منهـا عقـول الرجـال اتحيـر
وإذا عوّدت للمعرفـة .. جـاك بأطيبهـا
وأنا والله إن ماني بمستغرب اللي يصيـر
لحيثـه مـن رجـال عـزازٍ مناسبـهـا
تميم الزحول اللي لـدرب العلـي تسيـر
ولدهـا الشجاعـة والكرامـة لشايبـهـا
أهل سطوةٍ يشبع بها بطـن ذيـب وطيـر
وأهل هيبةٍ يآمن بهـا اللـي يلـوذ إبهـا
تواريخهم من قبـل عنتـر وقبـل الزيـر
بطـولات والله يلعـن الـلـي يكذبـهـا
على صفحة الأمجاد سطّر لهـم تسطيـر
وفناجيـل فرسـان المياديـن تشربـهـا
ومدحي تميم .. أطلق لساني .. وله تبرير
كبـار البخـوت اللـي كبـارٍ مناصبهـا
لأجل دعوة مساعد لذا اليوم أحث السيـر
ما غير أنظر الساعة وأسابـق عقاربهـا
وساعة وصلت تمير .. كنّي من أهل تمير
لقيت الرجال اللـي تضاحـك حواجبهـا
تمنّيت تسقيهـا المخاييـل كـل عصيـر
وتمنّيت يصبح جوّها .... مثل جـو أبهـا
بن بديع
ليست هناك تعليقات:
إرسال تعليق