قصيدة عبدالله المشيعلي الحربي
بالدويش
راكب اللي صمموه الاد بوش
مقلحز مثل الشجاع المستهيش
............................................................................................
راكب اللي صمموه الاد بوش
مقلحز مثل الشجاع المستهيش
هيكلة مزموم بروم محفوش
ضد صفق النود مسلوب الكليش
بالجهاز مبرمج ن تصمبيم خوش
جمس صمم ملكي ماهو غشيش
أحرفه في هيكله مثل النقوش
يو اس اي امريكا بالانقليش
يشتغل من نوشة المفتاح نوش
دقمة الريموت والا بالسويش
حندوانه في حشا جوفيه يجوش
واللهب مع مصدر العادم يطيش
يرتطن رطنة غضب كنه يهوش
تقل ينبي حط رجلك ما عليش
جربكسه والتشالي والدشوش
تماتيكي بالسريع وبالشويش
ان دغته يرتقص تقل مخروش
وان ختلته ينسهد مثل الحنيش
مع ذعاع النود جامه ما يدوش
فل كامل مركزي الكندنيش
من بريده مبتدا سيره غبوش
والضحى ملفاه ديوان الدويش
شيخ علوا شيخة ماهي قروش
ورث جد وعد من عهد القريش
عزوته جوزا وجواده كروش
ولابته حمر النواضر سناد الخيل جيش
مقدم جمع مطير باليوم العبوش
ما اخذوها في وسايط بخششيش
اخذوها بالفعايل والنموش
والبيوت اللي بها الجالي يعيش
ملتجا البردان بايام الرشوش
والفقير يعيش باطرفهم غويش
العشا من عقر البل والكبوش
يشبع المشفوح ويخلي عريش
النحاوي والفداوي والهتوش
يوم مابه بسكويت وسندويش
سيرة الدوشتن شامخة العروش
تذهب الاجيال والذكرى تعيش
ما يخلد مدح من هرج مغوش
ولا يزرهب بالعرب فرة كديش
لوتنصب وانتصب بعض الختوش
مكسبه من منصبه خيشة نفيش
الضحاضح ما يروون العطوش
ما يعقب للحفيد ولا قطيش
ولا يثور زناد فارغة القفوش
والمخالب ما تصيد بدون ريش
ما استندت بمحزم الطاروق طوش
ما اتخمش في معاني اتخميش
اعرف ان عبدالله الماجد يشوش
الدويش ابن الدويش ابن الدويش
وقالو ان سعود بالطرقي بشوش
جيت اسلم وابعلم جيت ليش
من قبيلة حرب جينا لك طروش
بلازم مخفيه لين تقول ويش
عبدالله المشيعلي الحربي
