للشاعر بدر الحويفي
رحمه الله
يا رجل ياللـي فـي غيابـي تكلمـت
علمك علي بالـي ورمـزك فهمتـه
ياللـي بحجـه مستحيلـه توهمـت
حولت حظـك وسـط بيـر وهدمتـه
سيلك تدفق مـن شفـاك وتخرمـت
ليتك عن اللي مـا استحقـه ردمتـه
وأن كان هادف لك هدف يوم هاجمت
العقـل شـوري والتزامـك بصمتـه
وكان الجهل سيطر عليـك وتقدمـت
ماظن يثبـت قولـك اللـي زعمتـه
وأن ضعت مع طيش الطواري وهايمت
بركـت للحـق المصيـب وغرمتـه
غادي وخيّـل لـك خيالـك ورهمـت
وسم الحنيش لو تلحسـه ماجغمتـه
غروك ناسٍ مـن نسمهـم تسممـت
واللي عطى الله لـو تبـي ماحرمتـه
انصحـك وإلا ماعلـي لوتقحـمـت
دام أحتمـل زلـت رفيقـي حشمتـه
ونصيحتي وجهة نظر مـا تغيشمـت
شبحي بعيد ومـن غـدا ماغشمتـه
شبحـي بعيـد ولاأستعديـت نظمـت
والشوك لاجاء فـي طريقـي دقمتـه
وليا بغيـت أهـدي هديـه وقسمـت
ماهـس بالميـزان قسـمٍ قسمـتـه
أنا ليـا منـي بالأوضـاع ساهمـت
أصـوّر الواقـع نظـر لارسمـتـه
ماني غشيم مـن التجـارب تعلمـت
وأن مال ميـزان القريحـه حكمتـه
لامعنت بأسلوب المعانـي وخاصمـت
خصمي بجـزلات المعانـي خصمتـه
بلحـام سكـرت الملاحـم ولحمـت
وعلـى منافيـذ الملاحـم برمـتـه
لاسقت طـاروق القريحـه وصممـت
حذفي علي اللـي يستحقـه رجمتـه
وبعض الكلام أخير من رده الصمـت
وأن جاء من الجاهل غلط ماجرمتـه
وعن بعض مانسمع ويهرج تشيمـت
وسلم الرجال أهل السلـوم احترمتـه
ولو كل ماثـارت عجاجـه تحيزمـت
تهت الطريق وكـل عايـر صدمتـه
مهما حصل بأسلوب عقلـي تحكمـت
ورأي الحكيـم المعتـدل مـا لطمتـه
لوكان به ناسٍ توجـه لـي الشمـت
مهمـا يقـال بغيبتـي مـا حلمتـه
بعض الكلام اليـا سمعتـه تلطمـت
وفيض المجالس ما أزعجتني نغمتـه
طبعي علي تأديب الأخـلاق داومـت
ومن ضاع عن درب السنع ما دعمته
لابس حرامي من شفا السيل وأحرمت
والعلـم بالقلـب المفتـح حزمـتـه
وحقيقـة الواقـع بهـا ماتحلـمـت
من مصـدرٍ ماثـوق سـر وكتمتـه
ان شافهـا وإلا نصيتـه وسلـمـت
وحددت لـه مرسـام حـد ووسمتـه
ودليتـه اليـمّـه وبالله تعصـمـت
الا أن تراجع صاحبي عـن وهمتـه
ظنه ظنيـن اليـا قريتـه وترجمـت
بالحـق وإسنـاد الوثايـق هزمتـه
وأن ضاق صدره من كلامي تبسمـت
وأن مد لي كف الرضـا مـا شتمتـه
ماني سفيه اليا أحترك عود برعمـت
واللـي مجنـب سيرتـي ماعزمتـه
وان دار دولاب الهواجيـس وأبرمـت
معناي عن نقـد العـوارف عصمتـه
مابعت في سوق الضغاين ولاسمـت
مـأخطي ومن ميّـل عليّـه خزمتـه
ماأفطر علي تشويه الأوضاع لاصمت
وراس الصديع اليا أعترضني حجمتـه
وبسلوم لزمـات الرياجيـل لازمـت
أسير مـع سلـم الرجـال ولزمتـه
وليـا سفهـت التافهـه ماتنـدمـت
وماعون خـلاق المشاكـل خدمتـه
وأنا مـع اللـي يفتهمهـا تفاهمـت
ومن لاتطرق منهجـي مـا زهمتـه
وأن حدني حـادي قوامـه وقاومـت
سبحت مع مـوج البحـر واقتحمتـه
جهـزت نفسـي للعبـور وتولمـت
عمق البحر لوهـاج موجـه دحمتـه
وجهتها بيضـاء صريحـه وحكمـت
أحكمت مضمـون الجـواب ونظمتـه
تم الجـواب اللـي نضمتـه وتممـت
والوصل مـن راع البريـد استلمتـه
وصدرتها بأسلوب هـادي وترجمـت
ومن لاظلم نفسه حشـا مـا ظلمتـه
أدخل علي الله بالخطـأ مـا تذممـت
وحق العباد وقدرهـم مـا هضمتـه
وجو الصداقـه ماسهجتـه ولغمـت
معرض عن الغايب ولا أكـل لحمتـه
ودام أمتلك نفسي عن الظلم حرمـت
لوكـان تجذبنـي لشخـص أتهمتـه
لبستهـا ثـوب المناعـه وسجمـت
وأرجي عسى الجاهل يوطي رضمتـه
,,,
