عبالله بن عون
الله من قلبن رمع فيه رماع,,,,,,واخلف يمومه عن طريق التسانيع
هجسن رمع ماله عن القلب خراع,,,,,,,,علي غاراته تشن المفازيع
مركز بنوكه بين محني الاضلاع,,,,,,,لانامو العربان سوا مشاريع
يشري بقلبي كل ليلن ويبتاع,,,,,,, وله الجوارح خاظعاتن مطاويع
ياورق ياللي بالتغاريد سجاع,,,,,,,طرقن على روس العياد النعانيع
ياللي غناك امن النياحه به انواع,,,,,,وصوتك يزيد امولع القلب توليع
هوليه يوم تروجع الصوت روجاع,,,,,,قصدك تزيد ملوع القلب تلويع
اسهرت عيني والمخاليق هجاع,,,,,,,وذكرتني خلن بعيد المراميع
راعي جديلن فوق متنه ليا انذاع,,,,,,كنه شليل اللي تتل المصاليع
ليا جا نهارن فيه صايح فازع,,,,, والخيل باطراف الجهامه شواريع
بيومن مثل يوم الرحا عجهم زاع,,,,,نهار اخو نوفا يفك المجاميع
مخلي سروج الخيل من كل صعصاع,,,,,,عقايله سرد الرمك والمداريع
يدلي بهندين للرقاب قضاع,,,,,,,في روس ضده غاديله لعاليع
سيفن شجيرن يامره قلب وذراع,,,,,ضربه يطوع مخطي الدرب تطويع
كم راس شيخن دقبه رومت القاع,,,,وخلي عشن لذياب نجد المجاويع
بيومن على ضده مخاييله اتباع,,,,,نهار يفرق شملهم عقب تجميع
غيمه عجاج الخيل غاره وامهجاع,,,,,وشمسه بواريق السيوف اللواميع
يشيب منه اللي على الديد رضاع ,,,,,يوم العذارا ذاهلاتن مفاريع
لاوالله الاصاحبي شد نجاع,,,,,بيني وبينه يهرع الذيب ويريع
عنه اتحرا العلم مع كل ذعذاع,,,,,انشد ولا عينت للعلم تسنيع
وعليه اصابتني عواريض واوجاع,,,,,ونار الغرام تميع القلب تمييع
اتلى العهد به يوم مضهوره انزاع,,,,,وجلع ضعنهم طلعت الشمس تجليع
بدون يبون بشرقي النهد مرباع,,,,,ولهم على اطراف الصداوىمراميع
راحو بعد حطو على القلب مرقاع,,,,,وعسالهم من عقب القفى مراجيع
ليا هف زملوق الطواليع ونصاع,,,,,وقفى خضارالنبت حد الطواليع
والارض صفرا عودها والثرا ضاع,,,,,وستبدلت عقب الخضار البلاقيع
وجونا تباريهم زهازيم الاقطاع,,,,,,كنه يقلطهم عقيط الطماميع
حف الربيع وعودوا لشفا ارياع ,,,,,ا لعلو نجداللي هبوبه ذعاذيع
ليامن نبت الصيف جاله تمرياع,,,,,,وضفى على هاك العباد المصاليع
اللي طويل عدودها عشرة ابواع,,,,,,وجلالها مثل الطيور المواقيع
يزميبهن طافح سرلبن لياماع,,,,,,كن من القصدير ياخذ تلاميع
دارن بها تركي ومحسن وهزاع ,,,,,,من حبها مالثلاثه مناجيع
ماكفت البره وجزعا وجزاع,,,,,واجنب جنوب اليا القهب والمجاظيع
والهم على منثورت العرق مرماع,,,,,هاك النفوداللي غضاها مهانيع
اضن يظرب للغضي درب الاسناع,,,,,واشوف زوله عقب صد وتمانيع
وفي غير شوف العين ماني بطماع,,,,, الا اناحصل لوهو سلامن وتوديع
عبالله بن عون
